|
|
|
|
Krugerwildtuin Vakansie Van ons lede was met 'n onvergeetlike vakansie met die karavane Kruger Wildtuin toe. Ben en Annatjie Pienaar deel hierdie vakansie met ons.
Teks en Fotos deur Ben en
Annatjie Pienaar
(Kliek op die foto om te
vergroot)
Vroeg
die oggend van die 30ste Junie 2004 het ons lank vooruit beplande vakansie
na die Kruger Wildtuin gerialiseer. Twee gesinne (Ben, Annatjie, Barend &
Johan Pienaar en Nico, Ilse, Izelle, Sumari & Franco Alberts) gewapen met
kameras, verkykers en karavane vol klere en kos het vertrek op 'n
onvergeetlike 13 dae vol avontuur en kosbare herinneringe.
Volgens ons verontwaardige kinders was 4 dae se ry
tot by die Kruger Wildtuin darem veels te lank. Ons het darem in drie
verskillende karavaan parke oornag:
Ons was deurentyd aangenaam verras met die skoon
en netjies ablusiegeriewe!
Oppad na Nelspruit het ons by die Sodwala-grotte
aangedoen en ook die watervalle by Watervalboven besoek. Soos egte
feesgangers het ons ook "Inniebos" kunstefees op Nelspruit bygewoon.
Voordat ons op die vierde dag (uiteindelik!) die beroemde Kruger Wildtuin
deur die Krokodil Hek betree het. Opwinding was by almal te bespeur toe ons
uit ons motors bondel om die vars (daardie dag ook erg warm) lug van die
Wildtuin in te asem en om die mans se honger mae te stil.
Ons eerste kamp was Onder-Sabie waar ons drie
aande oorgebly het. Vandaar het ons elke dag 'n ander roete gevolg op soek
na die "Groot Vyf". Groot was die opwinding toe ons ons eerste diere gewaar
- 'n trop Rooibokke. Min het ons geweet dat ons om elke hoek en draai en
elke bos 'n Rooibok sou sien. Om Olifante en Kameelperde te sien, was later
nie meer so opwindend nie. Die Luiperd, Buffel en Renoster was egter baie
skaam en wou nie sommer hul verskyning maak nie.
Die laaste twee aande het ons in Satara oornag.
Weereens is ons soggens 5 uur uit die bed gejaag sodat ons om 6 uur die
diere by die watergate "kon vang". Met net een dag oor, besluit ons om tot
by Skukuza te ry, daar middagete te geniet en dan met 'n ander roete terug
tot by Satara te volg. Met ons terugrit het ons skielik 3 pragtige Buffels
langs die pad gewaar. Ons kon ook Leeus dophou wat aan 'n Kameelperd-karkas
vreet.
Danksy Nico, kon ons deurlopend met mekaar
kommunikeer, deur middel van die tweerigting-radios, wat hy vir ons gereël
het. So kon ons verskeie gebeurlikhede aan mekaar deurgee of sommer net
gesels.
Te gou het die laaste van die 5 dae in die
Wildtuin aangebreek, en het ons die Wildtuin deur die Orpen-hek verlaat
oppad na Swadini, waar ons twee dae gebly het. Daar kon ons 'n bietjie rus
en al die stof afskud van die Wildtuin. Die kinders kon na hartelus in die
warm swembad baljaar, trampoline spring, of putt-putt speel. Daar was ook
uurliks georganiseerde aktiwiteite vir kinders en soms ook vir die
grootmense. Vandaar kon ons verskeie besienswaardighede besoek, soos 'n
Sywurm-plaas, 'n bootrit op die Blyde Rivier dam, die Eggo-grotte, Burke's
Potholes, God's Window, Mac-Mac Watervalle, en die dorpie Pelgrimsrus.
Ongelukkig was dié twee dae te kort vir alles wat 'n mens daar kan doen.
Op die Saterdag-oggend (die 11de dag) het die drie
gesinne vir twee aande hul eie rigting gegaan (familie verpligtinge) en
ooreengekom om die laaste aand (Maandag) van ons toer weer bymekaar te kom
om die laaste skof van ons terugrit gesamentlik aan te pak. Dit was heerlik
om ons toer af te sluit in die Karoo Nasionale Park by Beaufort-Wes.
Dit was 'n moeë maar hoogs tevrede toergroep wat
Dinsdag-middag by hul huise geariveer het met baie herinneringe, baie foto's
en baie vuil wasgoed.
Ons innige dank aan Nico Alberts, ons toerleier,
wat so 'n puik vakansie gereël het. Al die eer kom ook ons Hemelse Vader
toe vir wonderlike weer en 'n voorspoedige reis.
Groete
Ben & Annatjie Pienaar
|
|
Stuur e-pos aan
Tygerbergstreek Webmeester met enige vrae of kommentaar ten opsigte
van hierdie webtuiste.
|
